विश्वकप २०२६: डेब्युटान्ट कुरासाओमाथि चार पटकको च्याम्पियन जर्मनीको ७-१ को सानदार जित ।

 अमेरिकाको ह्युस्टनमा सम्पन्न फिफा विश्वकप २०२६ अन्तर्गत समूह ‘ई’ को आफ्नो पहिलो भिडन्तमा पूर्वविजेता जर्मनीले सानदार सुरुआत गरेको छ। चार पटकको विश्वकप च्याम्पियन जर्मनीले पहिलो पटक विश्वकप खेलिरहेको क्यारेबियन राष्ट्र कुरासाओलाई ७-१ को फराकिलो अन्तरले पराजित गर्दै प्रतियोगितामा आफ्नो सानदार उपस्थिति जनाएको हो।

खेलको सुरुआती छैटौं मिनेटमै फेलिक्स निमेचाको गोलमार्फत अग्रता लिएको युरोपेली पावरहाउस जर्मनीलाई नवप्रवेशी टोलीले केही बेर कडा चुनौती दिएको थियो। करिब १ लाख ५५ हजार मात्र जनसंख्या भएको कुरासाओका लागि २१औं मिनेटमा लिभानो कोमेनेन्सियाले ऐतिहासिक गोल गर्दै खेललाई १-१ को बराबरीमा ल्याएका थिए। यो कुरासाओको विश्वकप इतिहासकै पहिलो गोल थियो।

तर, कुरासाओको त्यो बराबरीको खुसी धेरै बेर टिक्न सकेन। ३८औं मिनेटमा निको स्लोटरबेकले बललाई जाली चुमाउँदै जर्मनीलाई फेरि अगाडि बढाए। त्यसपछि पहिलो हाफको अतिरिक्त (इन्जुरी) समयमा काइ हाभर्ट्जले पेनाल्टीमार्फत गोल गरेपछि जर्मनी ३-१ को सहज स्थितिमा पुगेर पहिलो हाफ टुङ्ग्यायो।

दोस्रो हाफ सुरु भएको ६९ सेकेन्ड नबित्दै जमाल मुसियालाले उत्कृष्ट गोल गरेपछि खेल पूर्ण रूपमा जर्मनीको नियन्त्रणमा गएको थियो। त्यसपछि जर्मन खेलाडीहरूले कुरासाओको पोस्टमा लगातार आक्रमण बुनिरहे। नाथानियल ब्राउन र डेनिज उन्डाभले एक-एक गोल थपे भने हाभर्ट्जले आफ्नो व्यक्तिगत दोस्रो गोल गर्दै टोलीको जितलाई ७-१ को विशाल अन्तरमा पुर्‍याए।

यस फराकिलो जितमा जोसुवा किमिचको भूमिका पनि निकै महत्त्वपूर्ण रह्यो, उनले दुईवटा उत्कृष्ट असिस्ट प्रदान गरेका थिए। समग्रमा हाभर्ट्जले दुई गोलको योगदान दिए भने निमेचा, स्लोटरबेक, मुसियाला, ब्राउन र उन्डाभले समान एक-एक गोल आफ्नो नाममा लेखाए।

यस सानदार नतिजासँगै जर्मनीले समूह ‘ई’ मा सुखद र आक्रामक सुरुआत गरेको छ। अर्कोतर्फ, विश्वकपको पहिलो अनुभव बटुलिरहेको कुरासाओले भने युरोपेली दबदबासामु टिक्न नसक्दा पहिलो खेलमै भारी हारको सामना गर्नुपरेको छ।

स्राेत ः एजेन्सी ।